Gainerakoan, bakana eta oiheskeriaren esparrukoa da Hegoaldean papereratzen den «poesia» (Meagherrek ardoari eginiko bertsoak, etab.). Eta ez dira horretatik gehiegi hastantzen Juan Bautista Gamiz sabandoar iruindartuaren dabilcenchoac (= seguidillas) eta beste hiruzpalau olerkitxo mundutarrak. Edonola ere, anekdota hutsa bainoago, zinez adierazgarria da Larramendik (haren hiztegiak eta gramatikak, batez ere) eta beronen jarraitzaileek honelako autore (ia lagundikide) zeharo apalen euskaltzaletzean eta literaturazaletzean izan zuten eragina. Beste idazle eta generoetan atzeman bezala (ikus, esaterako, Agirre Asteasukoaren erreferentziak, etab.), euskaldun jesuita predikariek (Mendiburuk eta Kardaberazek, batik bat) eragin nabarmena izan zuten beste batzuk idazluma hartzera ausartzeko orduan.