Euskal literaturaren amaraunean puntu batetik besterako bidea egiteko gunea da hau, Literaturaren Zubitegia.

Idazleetatik abiatuz, elkarrengana eta haien lanetara eta elkarren lanetara zubiak eraiki ahal izateko gunea.

Idazleen gunea da, idazleen arabera antolatua datorrelako gunea. Baina bada, era berean, haien lanarena ere, idazleek sortu dituzten lanetara iritsi ahal izateko zubi ere badelako.

Idazlea eta idazlana bere literaturaren testuinguruan osatzen da, ordea, eta, asmo horrekin, hainbat esku-liburutan, aldizkaritan eta bestelako literatur lanetan idazleei buruz esan eta idatzi dena ere jaso dugu. Izan ere, idazleak idatzi dituenek eta idazleaz idatzi direnek, autorearen aurkia eta ifrentzua bailiran, irudi osoa egiteko bidea ematen digute-eta.

Era berean, Armiarmak literatura sarean josteko dakarren ildoari jarraituz, idazlanekiko erreferentziak, kritikak eta on-line dauden testuekiko loturak bildu nahi izan ditugu.

Hori guztiori, azkenik, gure literaturaren eguneroko hainbat elementurekin osatzen joan nahi dugu, eta gune honetara ekartzen ahaleginduko gara literaturaren inguruko albisteak, elkarrizketak, agenda...

Literaturaren poliedroak eskaintzen dituen hainbat aurpegitatik, literaturaren amaraun ahalik eta josiena ehundu dezagun.