Eizagirre Aiestaran, Jose
Gipuzkoar idazlea eta eleberrigilea (Tolosa, 1881 - Donibane Lohizune, 1948). Zuzenbideko ikasketak egin zituen Madrilen. Aldizkari ugaritan idatzi zuen (Euskal Esnalea, Gure Herria, Euskalerriaren alde, Yakintza, Gernika). 1913. urtean Basotarrak operaren libretoa idatzi zuen. Eusko Ikaskuntzako kide izan zen eta hitzaldi asko eman zituen han eta hemen euskarari eta euskal literaturari buruz. Euzko Alderdi Jeltzalekoa zen; Madrilgo Gorteetarako diputatu aukeratu zuten Gipuzkoan 1918an eta 1931n. 1937an Euzkadiko Auzitegi Militarreko buru izendatu zuten. Gerraren ondoren Ekaitzpean eleberria eman zuen argitara erbestean (Buenos Aires, 1945).