literaturaren zubitegia

977 idazle / 4.676 idazlan
7.232 esteka / 5.646 kritika / 1.828 aipamen / 5.232 efemeride

  A B C D E F G H I J K L M N O P R S T U V W X Z  

Manu Ertzilla

«Bizkaiko euskal olerkariak»
Santi Onaindia

Egilea editore, 1990

 

Manu Erzilla

 

        Anboto'k, Bizkaiko mendi zangarra danak, ba-dau bere lillura bizia andik naiz emendik begiratu. Atsegin aundiko erritxoak, Arrazola, Axpe ta Martzana, daukaz bere oiñetan jainko-aizun gurtzaille iduri. Lenago erri oneitatik bakotxak eukan bere udala; gaur, pozik ez dagozala be, ez daukie udal-etxerik: Apata'ra joan bear euren erri-gauzak atontzeko... Emengoxe zan nire ama, Jazinta Baseta.

        Emengoxe da baita Manu Erzilla, urte batzuk Zornotza'ko Udaletxean egin ondoren, Bilbo'ra aldatu zana.

        Euskaltzale dogu, eta euskal idazle ez-ezik, olerkari arnas-oneko. Amabi urte dirala argitara emon euskun poesi-liburu bat, «Hitzik ainitz idatzi dut» deritxona (Bilbo, 1977), 116 orrialdekoa.

        Ona liburu artatik artutako lantxo bi:

 

                HAIZEA

 

                Haizea

                gaua

                iluna ta bakardadea

 

                gau ilunpeko haizeak

                bakardadea dakarkio

                ene bihotzari.

 

                haizea

                gaua

                iluna

                bakardadea eta euria

 

                gau euritsuko bakardadeak

                hizozten du ene bihotza.

 

                bakardadea

                haizea

                euria

                gaua eta ni ororen erdian.

 

 

                GIZONA

 

                Gizona jarri zen

                paper zuriaren aintzinean

                eta ezin izan zuen

                ezer sortu

                amabigarren iturria agortu bai zuen,

                maindireak destolestatu zituen

                eta amets egitea

                nahi izan zuen

 

                                zoritxarrez

                                egun hartan

                                ametsak ere antzu ziran

                                gogoa hain txiroa eta urrian zeukan.

 

Bilaketa