osteguna, martxoak 13

HITZORDUAK

Martxoak 15: Unai Elorriaga idazleak Josu Aurrekoetxea musikariarekin Odola kantari. Euskal kantugintzaren Tragepedia emanaldia eskainiko dut martxoaren 25ean (asteartea) 19:30ean Bilboko Itsas museoan. Loraldia.

Martxoak 26: Ane Labaka Mayoz idazleak Hezur berriak bere lehen poema liburua aurkeztuko du martxoaren 26an (asteazkena), 12:00etan Donostiako Udal Liburutegi Zaharrean. Argitaletxea: Susa literatura.

EMAILUA

Sexua eta generoa hizkuntzaren labirintoan
Lisipe bildumak 16. alea kaleratu berri du, Ariadnaren haria izenekoa. Azpitituluak ("Sexua eta generoa hizkuntzaren labirintoan") argi adierazten du Beatriz Fernándezek idatzitako liburuak jorratzen duen eremua: hizkuntzaren ---eta batez ere, euskararen--- tipologia eta erabilera soziala, sexuaren edota generoaren ikuspegitik. Labirinto horretatik onik ateratzeko, filologiaz, politikaz, historiaz eta umorez osatutako hariak osatzen ditu egileak, zorroztasun zientifikoa eta dibulgazio gozagarria uztartuz. Hizkuntzaren erabileraren inguruan aspaldi hasitako hausnarketa kolektiboari segida eman nahi izan dio, ezagunak diren alderdiak birpentsatuz eta ezezagunak direnak erakutsiz. Euskara disidentea bera eraikitzen (edo behintzat euskal hiztunak deseraikitzen) laguntzeko baliagarria izan daitekeen gogoeta.
Ariadnaren haria - azala - Beatriz Fernández

SOLASEAN

Uxue Alberdi: «Idazketa desiraren eta izuaren arteko borrokan jokatzen da»
Gara, 2025-03-09

Jule Goikoetxea: «Subjektu berriak nahi baditugu, haien arteko botere erlazioetan eragin behar da»
Campus, 2025-03-06

Miren Amuriza: «Oso leiala izan naiz beti aita sinboliko eta ez sinboliko guztiekin, kosta zait apurtzea»
Gara, 2025-02-15

IDAZLEEZ ARI

Amaia Lasa

Amaia Lasaren poesia fundazionala da, gerora garatu den emakumezkoen literatura baten aldarria, laudorio faltsu guztien dekoratua suntsitzeko behar zen aurreneko mailukada. Bera da gure literaturaren lehen emakumea, berak dakarrelako lehenengoz emakumea gure letretara.

Xabier Lete

Giza izatearen zergatiaz galdetzen du, kexu eta samina adieraziz; kezka orokor horrek hainbat adar hartzen ditu gero, abstrakzioaren bitartez poema erlijiosoak egiteko, edo konkrezioaren bidez euskal gizartearekiko ezinegona azaltzeko.

Ramon Saizarbitoria

Gai berritzearekin batera teknika berritze handi bat ekarri zuen Saizarbitoriak, Europako literaturan indarrean zebiltzan joera berrien eraginez; teknika berritze hau ez da baliabideen erakuspen hutsa, baizik eta belaunaldi berri baten kezkak bere modu literario egokienean emateko ahalegina.