Onaindia Natxiondo, Mario
Politikari eta euskal idazle bizkaitarra (Lekeitio, 1948). 1966an ETAn sartu zen; 1969an atxilotu eta Burgosko prozesuan bi heriotza-zigor ezarri zizkioten. Indultatu egin zuten, baina 1977 arte preso egon zen. EIA alderdiaren sorreran parte hartu zuen eta idazkari nagusi izendatu zuten. ETA politiko-militarrak borroka armatua utz zezan lan egin zuen ondorengo urteetan. 1980an Eusko Legebiltzarrerako parlamentario hautatua izan zen. 1981ean Euskadiko Ezkerra alderdi berria sortu zenean, idazkari nagusi izendatu zuten. 1985ean politika aktiboa utzi zuen. 1993an PSE-EE alderdi sortu berrian sartu zen eta 1994ko hauteskunde autonomikoetan PSE-EEko parlamentario hautatu zuten. Nobela eta ipuinak idatzi ditu (Elurtzan datzaten zuhaitz enborrak, 1977; Grand Placen aurkituko gara, 1983; Olagarroa, 1987).